Restorán italianu "Gepetto"

Esta ye una crítica que faigo al restorán italianu "Gepetto". Trátase d'una cadena de restaurantes qu'hai n'Uviéu ya Xixón. Güei voi falavos sobre'l restaurante qu'hai en Xixón que s'atopa na Cai San Bernardo, cerquina de la Casa Conceyu y tamién de la playa San Lloriezu.

NOME: Restaurante italiano "Gepetto"
DIREICIÓN: Cai San Bernardo
LOCALIDÁ: Xixón, Asturies.
TIPU COCINA: Cocina italiana.
VALORACIÓN: 12/20
PRECIU MEDIU: 12-15 EUR/persona.
TARXETES:Toes.

Esti ye un restorán d'esos que cuando asoleya cierta fama, paez que tan toos ellí. Sigún les hores, siendo un vienres, un sábadu o un domingu, tienes de facer reserva y hasta esperar un tiempín si quies comer ellí. Nel branu el tiempu d'espera ya me pasó de tener d'esperar hasta tres cuartos d'hora, tiempu que dediqué a pasiar pola playa y alredores.

El restorán ye uno d'esos que tá bien decoradino, n'un amago de dar un ambienti rústicu onde predominen los colores terracotas, ocres y amarronaos. Los baños son permodernos, con grifu automatizáu y too, d'esos que cuando pones les manes salte el chorrín d'agua. En xeneral tan llimpios, a non ser qu'haiga muncha xente y tea mui usao.

La última vegada que tuvi ellí foi fai pocu. Llegué ceo con unos amigos y nun tuvimos grandes problemes p'atopar mesa. Un primer defeutu del serviciu ye que tuvimos de tar esperando unos minutinos (realmente pocos, 3-4), pero nun tába nenguna persona p'atender na barra por si queríes tomar un vinucu o daqué similar. Tal vegada por ser rápido'l pasu a la mesa nun había naide ellí.

Dempués, miramos la carta y otru defeutu ye la manía esa de llamar restorán "italianu" a toos los restaurantes que faen pasta ya pizzes. En vegada del pomposu nome de "restorán italianu" taben meyor llamándolu "Gepetto" Pizza & Pasta, que ye lo más axustao a la realidá. Porque na carta, había unes entrauques, pizza, ya pasta, y pa finalizar cuatro platucos (lliteralmente) de carne. Dempués, los vinos son mayormente españoles y los italianos redúcense a dalgún Lambrusco o Chianti, y too ello mui caro. ¿Onde se vio pagar 11 EUR por un vinu que nel supermercáu nun llega a 3? Si fueren 6 EUR podía comprendese y inda asina ganaben la tira porque tien que yos salir más barato qu'a min mercándolo nun supermercáu.

Tres de mirar la carta, decidime por un fetuccine prietu con gules ya gambes y una ensaladuca pa compartir. Los fetuccine taben bien, yeren realmente prietos y de sabor nun taben mal y la racionina yera abundante. La ensalada yera una ensalada mixta y acabé fartu porque yera muncha cantidá: tenía bonitu a esgaya y l'amigu con quien compartí, magar el so estómagu, nun foi quien a acabalo. Yera un pocoñín desaxerao pa dos persones. El casu ye que se te quiten les ganes de tomar postre o'l cafetín, como foi nesti casu.

La bebida, visto que nun dibemos tomar vinu, foi un agua con gas, corrientuca. Nun había San Pellegrino, que yera lo qu'había que tener nun restorán italianu. El serviciu, magar foi amable, tardó un pocoñín en atender coses como la cuyar que pedi pa comer los fetuccine. Tolos restaurantes italianos deberíen saber que cuando se come pasta llarga tipu fetuccine, spaghetti o tagliarini hai que poner una cuyer pa facilitar enroscalos col tenedor. Regla, vamos, básica.

En definitiva. Si queréis un restorán onde comer pizzes ya pasta y que seya relativamente abundante ya baratu, "Gepetto" ye una bona eleición. Pero nun esperéis más. Magar la so fachada de restorán bon pola so decoración, nun ye más qu'un sitiu de pizzes ya pasta, non de braera cocina italiana. La mío relativamente baxa puntuación ye más polos defeutos qu'atopé que pola comida en sí, que tampoco foi una cosa del otru mundu.