Café-Pub "Diabolus"

Anque emigráu fuera d'Asturies, una d'eses "lleendes urbanes" que tanto abunden, nel mío corazón siempre hai un llugar pa la mío patria asturiana. Y como bon asturianu, nun pue faltar el cafetín o les cenes. Facía yá dalgún tiempu que nun diba tomar café a la Pola y atopeme col Café-Pub Diabolus, que polo visto yá fai un tiempín qu'abrió, pero yo nun me decatara d'ello. El casu ye qu'un día fui pola mañana y sorprendime del serviciu y la decoración y eso a pesar de que na Pola hai delles cafeteríes qu'ufierten un bon serviciu a un preciu razonable.

NOME: Cafe-Pub Diabolus
DIREICIÓN: Cai Pedro Vixil esquina Cai Celleruelo (frente a la Casa Conceyu)
LOCALIDÁ: La Pola (Siero), Asturies.
TIPU DE CAFETERÍA: Categoría media.
VALORACIÓN: 15/20
PRECIU MEDIU: 1 EUR/café; 1 EUR/pinchu.
TARXETES: n.a.

El Café Pub Diabolus alcuéntrase nel centru de la Pola, frente a la Casa Conceyu, na esquina ente Pedro Vixil ya Celleruelo onde enantes taba el Bar "El Polesu". Como ficieron reformes nel edificiu vieyo qu'elli taba, el sitiu ye nuevín y tá mui bien preparao. El nome nun se yo por qué ye, pero pamidea quieren dar una imaxen transgresora col nome, pero nun tien nada de ver con coses gótiques nin satániques. Lo que tien de particular ye que ye cafetería pol día y pub pola nuechi ya que baxen unes cortines pa que la xente nun seya vista dende'l exterior. Hai una pequeña terracina onde tomar daqué fuera si se quier, pero dentro hai una barra y delles meses toes elles en decoración moderno.

Na cafetería ufierten lo que ye típico nuna cafetería asturiana: cafés, llicores, un caldín perprestosu cuando fai fríu ya pinchos. El café ye presentáu nuna tacina prieta con baxuplatu cuadráu blancu y una moderna cubertería. Amás, dante una galletina col café, aparte del azucre o l'edulcorante. En cuanto al sabor, nun ye meyor nin peor que n'otros llugares: ye un café de calidá media pa un sitiu mediu. El caldu ye presentáu en tacina de consomé colos churruscos aparte pa que si la persona quier puea echalos nel caldo.

Los pinchos son ricos y variaos. Comu exemplu, el pincho tortiella rellena. Pa quien nun ye asturianu, esti tipu de pinchu tá compuestu de dos bases de tortiella y nel mediu añádese-y xamón ya quesu, llechuga, tomate y mayonesa. Equí yera un cachín de tortiella servíu nun platu cuadráu colos cubiertos de rigor y un bollín de pan p'acompañar. Quien nun quiera tortiella, tienlos d'otres coses: pitu, llombu, etc., nuna amplia variedá d'ellos.

L'ambiente ye bono y siempre tá enllenu, polo que a vegaes ye un pocoñín difícil atopar mesa si vas a determinaes hores. El serviciu ye atentu y si coincide, pue pasate que te dean unes cazuelines gratis sobre too cuando llega la hora del meudía. Nel mío casu yeren unes cazuelines, tamién cuadraes, con arbeyos en salsa de tomate too calentino que taben perprestosos. Otres vegaes son unes rebanaes de pan tipu baguette con chorizu o llombu, pa pinchar.

El preciu ye más que razonable, sobre tou nestos tiempos que cuerren, a un 1 EUR el café con llechi normal ya 1 EUR el pinchu.

Y si la nuechi nun te confunde, inda pues quedate pa tomar un cacharru, ya otres copes cuando entra a funcionar el pub.

En definitiva, una bona idega esa de la polivalencia ente el café ya'l pub, ensin renunciar a nengún tipu de clientela y con precios más que moderaos ya con calidá.