D'oricios va la cosa.

Voi falavos güei de cocina asturiana. Pue parecer un contrasentíu escribir na llingua asturiana pa facelo, pero de xuru que quien llea esto nun tendrá problemes en entendelo. L'asturianu ye una llingua a piques d'extinguise pola inaición del actual gobiernu asturianu, que nun ye favoratible a la so oficialidá, anque defiende lo contrario n'otres zones. Como falante d'esta llingua, ye perimportante el so usu, pa que nun muerra.

Dempués d'esti alegatu a favor de la llingua, comu esti blog nun ye políticu, vamos a lo que tábemos: la cocina asturiana.

Una de les coses que carautericen la cocina asturiana ye l'usu del pescao y del mariscu como nun pue ser d'otra forma nel Cantábricu. Uno de los más destacaos y que nun se suel utilizar muncho n'otres cocines ye l'oriciu (cast. erizo de mar, port. ouriço, gall. ourizo, cat. eriçó). L'oriciu ye un equinoideu que vive nel fondu del mar y que tien unes púes que dan la so forma carauterística. N'Asturies, l'oriciu consúmese cocío, como acompañamientu, o en recetes más o menos ellaboraes. Ye un mariscu típico nos chigres (sidrerías) y casen bien con un culín de sidra fresquino que faiga la boca agua. Tamién son consumíes les güeves, que tan perprestoses ya mui riques. Hai delles cases dedicaes a la industria conservera que faen un paté d'oriciu que tamién sirve comu entrante con mini tostaes en cualquier xinta. Güei póngovos una receta d'oricios rellenos.

ORICIOS RELLENOS

Ingredientes (pa 4 persones)
·2 kg. d'oricios ·1 cebolla rallada ·100 gr. de tomate maduru ·2 güevos ·50 gr. de nata llíquida ·Perexil ·Aceite ·Sal.

Ellaboración: Cepíllense doce pieces d'oricios pa quita-yos les púes. Ábrense con unes tisories y sácase-y tol so conteníu con cuidadín de non rompelos (recórtense por encima de la mitá).

Resérvense les cáscares y les güeves, tamién nomaes coral. Ábrense los otros oricios, resérvense les güeves y tírase tolo demás.

Ponse nel sartén un pocoñín d'aceite ya la cebolla rallada a refogar. Cuando tea doradino, xuntáse-y el tomate ensin piel nin simientes, en trocinos.

Pásase too bien, incorpórense les güeves d'oriciu ya los güevos batíos. Remuévese bien too pa que lligue y dempués échase perexil, espolvoreando.

Rellénase con too ello les doce cáscares que teníemos reservaes, colocando tres en cada platu, poniendo un pañín ente les cáscares y el platu.

Pue dase un golpín de grill si se quier pa gratinalos, pero pueden quedar menos xugosinos.

(Receta traducía de MÉNDEZ RIESTRA, E.; Cocinar en Asturias, Ediciones Trea, Xixón, 2002, p. 130)

Bono. Y eso ye too. Qu'aproveche.